Útikennsla/útinám er kennslustund

sem fer reglulega fram utandyra

og náttúran og/eða umhverfið notað sem kennslurými og kennslugögn.

Kennslustund felur í sér námsleg markmið svo áður en farið er í útikennslu* er rétt að setja sér markmið með stundinni, þ.e. skilgreina að hvaða námsmarkmiðum er unnið í viðkomandi stund og hvernig er metið hvort þeim sé náð.

Til að hægt sé að tala um útikennslu þarf kennslan að fara reglulega fram utandyra svo hún verði sem eðlilegasti hluti skólastarfsins.  Einstök vettvangsferð eða viðburður utandyra getur ekki talist eiginleg útikennsla en hins vegar hafa öll börn gott af því að fara einstaka vettvangsferð því öll útivera er betri en engin.

Í útikennslu þarf umhverfið og/eða náttúran í kring að vera efniviður kennslunnar.  Þó öllum sé hollt að fara út, jafnvel bara til að skrifa í skólabækurnar á góðviðrisdegi, byggir útikennslan á því að það sem náttúran og/eða umhverfið bjóði upp á á hverjum stað sé notað með beinum hætti í kennslunni.

Það er svo sjarminn við útikennslu að það er aldrei hægt að sjá fyrir hvað gerist í hverri stund svo maður þarf að vera sveigjanlegur, geta lagt skipulag kennslustundarinnar til hliðar og brugðist við því sem kemur upp með því að nýta það til náms og til ánægju.

____________________________________

* Eitt af meginmarkmiðum Náttúruskóla Reykjavíkur er að styrkja kennara að sinna sínu fagi utandyra.  Hér er því notað hugtakið útikennsla þar sem það snýr að kennaranum og á betur við starfsvið Náttúruskólans.  Hugtakið útinám fellur hins vegar betur að umræðu um nám nemenda sem að sjálfsögðu er sameiginlegt viðfangsefni allra þeirra sem sinna fræðslu.