Útikennsluapp - Náttúruskólinn óskar eftir áhugasömum þátttakendum

Oddný Sturludóttir, formaður skóla- og frístundaráðs, afhenti í gær styrki til fjörutíu verkefna sem eiga að stuðla að framþróun í skóla- og frístundastarfi. Þar á meðal hlaut Náttúruskóli Reykjavíkur styrk fyrir verkefnið Útikennsluapp.

Útikennsluapp felst í því að búa til smáforrit (app) sem birtir tækifæri til útináms á þeim stað sem viðkomandi er staddur á (gps-hnitað). Forritið færir efnið nær notandanum, upplýsingarnar nýtast honum hér og nú og leiðbeiningarnar eru markvissari en ella.

Helena Óladóttir, verkefnisstjóri Náttúruskóla Reykjavíkur, tekur styrknum og rósinni fagnandi úr höndum Oddnýjar Sturludóttur, formanns skóla- og frístundaráðs.

meira...

7. mars 2013 11:56

Earth Hour nálgast!

Nú styttist í að heimsbyggðin slökkvi ljósin að kvöldi 23. mars til að vekja athygli á umhverfismálum um víða veröld. Reykjavíkurborg mun slökkva ljósin, líkt og í fyrra, og Náttúruskóli Reykjavíkur mun að sjálfsögðu ekki láta sitt eftir liggja!

http://www.youtube.com/watch?v=2UywrjnOaUE

Í tilefni af viðburðinum er skorað á almenning til að taka þátt og það er hægt á allan mögulegan hátt. T.d. heitir skóli því að starfa "pappírslaust" til loka skólaársins ef nógu margir fást til að planta trjám. Sjá hér: http://www.youtube.com/user/earthhour?feature=watch

Væri tækifæri hér fyrir íslenska skóla að taka þátt? Látið ykkur detta eitthvað snjallt í hug og sameinist heimsbyggðinni í þágu umhverfisins.

21. febrúar 2013 08:55

Grenndarsvæði Rofaborgar

Í vikunni var undirritaður samningur um grenndarsvæði Rofaborgar í Elliðaárdal um samstarf og nýtingu svæðisins.

Markmið samstarfsins er að skapa vettvang fyrir umhverfisfræðslu í nágrenni leikskólans og unnið verður á grundvelli sjálfbærrar þróunar hvað varðar nýtingu og umgengni.

Þórólfur Jónsson, f.h. Umhverfis- og skipulagssviðs, og Þórunn Gyða Björnsdóttir leikskólastjóri Rofaborgar undirrita grenndarsamninginn.

meira...

13. febrúar 2013 09:28

Ársskýrsla Náttúruskólans 2012

Nú er ársskýrsla Náttúruskólans aðgengileg á vef skólans, sjá hér. Í henni er fjallað um starfsemina á síðasta ári og kemur þar greinilega fram að menntun til sjálfbærni er vaxandi þáttur í fræðslu á vegum skólans enda er Náttúruskólinn einn af fáum aðilum sem býr yfir sérþekkingu á sjálfbærni og skólamálum.

Í skýrslunni er einnig að finna ýmsar gagnlegar upplýsingar um umfang útináms. T.d. er í skýrslunni kort sem sýnir grenndarsvæði og grenndarskóga sem samningar hafa verið gerðir um milli skóla og borgar og birt er yfirlit um námskeið og fræðslutilboð sem skólar og ýmsir aðrir þáðu af Náttúruskólans hálfu á síðasta ári.

Forsíðumynd ársskýrslunnar sýnir börn og leikskólakennara úr leikskólanum Hálsaskógi bíða spennt eftir hádegisverði á fallegum sumardegi á grenndarsvæði leikskólans í júní 2012.

meira...

29. janúar 2013 13:32

Nýtt símanúmer Náttúruskóla Reykjavíkur

Náttúruskólinn hefur fengið nýtt símanúmer á Skóla- og frístundasviði, 411 7031.

Eins og áður er einnig hægt að hafa samband við skólann með því að senda tölvupóst á netfangið natturuskoli@reykjavik.is eða beint á verkefnisstjóra hans helena.oladottir@reykjavik.is.

23. janúar 2013 10:18

Og enn flutningar...

...og enn er Náttúruskólinn símasambandslaus.

Mér þykir það mög leitt en það er ekki búið að tengja símann ennþá svo ég get ekkert upplýst um nýtt símanúmer Náttúruskólans. Skólinn er hins vegar kominn með starfsaðstöðu á Skóla- og frístundasviði Reykjavíkurborgar og starfsemin heldur ótrauð áfram.

Ég minni á að hægt er að senda tölvupóst á netfangið natturuskoli@reykjavik.is.

Með kveðju,

Helena verkefnisstjóri.

16. janúar 2013 08:44

Enn af flutningum

Af gefnu tilefni er rétt að upplýsa það að í kjölfar flutninga Náttúruskólans er símanúmer hans ótengt ennþá. Það hefur valdið mörgum vandræðum en best að hafa samband með tölvupósti á meðan þetta ástand varir. Ég mun upplýsa um nýtt símanúmer Náttúruskólans um leið og það er orðið virkt.

Þangað til bendi ég þeim sem vilja komast í samband við Náttúruskólann á að senda tölvupóst, natturuskoli@reykjavik.is.

11. janúar 2013 14:22

Náttúruskóli Reykjavíkur flytur á SFS

Um áramótin flutti starfsemi Náttúruskólans frá Umhverfis- og skipulagssviði (USK) til Skóla- og frístundasviðs (SFS). Flutningurinn helst í hendur við sameiningu sviða Reykjavíkurborgar og hefur staðið til í alllangan tíma.

Náttúruskólinn er eftir sem áður samstarfsverkefni USK og SFS þó með flutningunum séu væntingar til þess að Náttúruskólinn geti enn betur stutt við bakið á árangursríku útinámi og umhverfismennt í leik- og grunnskólum borgarinnar.